Farþegakannanir RMF hljóta styrk frá KEA

Mynd: kea.is

RMF hefur hlotið styrk úr Menningar- og viðurkenningasjóði KEA, til áframhaldandi rannsókna meðal farþega skemmtiferðaskipa hérlendis.

Styrkinn hlaut RMF til að framkvæma kannanir meðal farþega skemmtiferðaskipa á Siglufirði, Húsavík og í Hrísey sumarið 2019.

Markmið kannana meðal farþega skemmtiferðaskipa er að safna upplýsingum um ferðahegðun, neyslu og ákvarðanatöku þessara gesta íslenskra sjávarbyggða og leggja grunn að mati á því hverju heimsóknirnar skila til ferðaþjónustu á viðkomandi stöðum.
Sumarið 2017 stóð RMF fyrir forkönnun meðal farþega við Akureyrarhöfn með það að markmiði að kanna gengi og framkvæmd við fyrirlagnir spurningalista til farþega.
Nú í sumar, 2018, var svo ráðist í framkvæmd könnunar þar sem spurningalistar tóku mið af spurningum sem í öðrum könnunum eru lagðar fyrir ferðamenn sem ferðast um landið á eigin vegum. Verið er að leggja lokahönd á samantektir á niðurstöðum þessara kannana.

Í viðtalsrannsókn RMF meðal hagsmunaaðila móttöku og þjónustu við skemmtiferðaskip, kemur m.a. fram að áskoranir við móttöku farþega í smærri höfnum eru að hluta aðrar en í þeim fjölsóttari. Þá er óljóst hvernig farþegar í smærri höfnum nýta þjónustu og afþreyingu á heimsóknasvæðum.

Niðurstöður kannana meðal farþega á ólíkum móttökusvæðum skemmtiferðaskipa veita möguleika á samanburði og dýpri innsýn í ferðahegðun, óskir og ákvarðanir farþega, sem svo aftur er mikilvæg forsenda fyrir ákvarðanatökur og uppbyggingu þjónustu við skemmtiferðaskip og farþega þeirra hérlendis.

Þórný Barðadóttir veitti styrknum viðtöku við úthlutunarhátíð KEA sem fram fór í Hofi á Akureyri þann 1. desember sl.